Казанның “Мөхәммәдия” мәдрәсәсендә төзекләндерү эшләре бара, "кирәкмәгән" китаплар урамга чыгарылган. "Мөхәммәдия" шәкертләре әйтүенчә, китапларны уку йорты җитәкчләре урамга чыгарырга кушкан. Кайбер дини китапларны аяк белән таптап йөргәннәр. Социаль челтәрләрдә атаклы мәдрәсә китапханәсе юкка чыгарыла дигән язма пәйда булгач, кайбер активистлар аларны коткарырга, үзләренә алып кайтырга дип килгән, әмма алар ишегалдыннан куып чыгарылган. Шәкертләр җәнҗал чыгудан куркып китапларны кире бинага ташый башлаган. Азатлык хәбәрчесе нәкь шул вакытка туры килде. Тарихи бинадан күченү инде атна дәвамында бара. Китапларның бер өлеше Мөзаффария, Буа мәдрәсәсенә җибәрелгән. Бу китаплар да сайланып башка уку йортларына җибәреләчәк, мөһим, кыйммәтле китаплар ташланмаячак дип ышандыралар.