Украинаның иң бай кешеләренең берсе, миллиардер Ринат Әхмәтов Bloomberg агентлыгына интервьюсында, аның компаниясе Русиядән килгән зыянны каплату өчен халыкара мәхкәмәгә дәгъва бирәчәк, дип белдерде.
"СКМ төркеме, һичшиксез, Русия агрессиясе китергән барлык зыянны каплату таләбе белән, Русиягә дәгъва белдерәчәк. Ышанам ки, Украина тулы күләмдә репарация таләп итәчәк һәм алачак", - диде ул.
Әхмәтов шулай ук, аның Мариупольдагы заводлары Русия оккупациясе шартларында эшләмәячәк, дип белдерде. Аның бу шәһәрдә ике заводы бар, анда 40 меңләп кеше эшли. Әхмәтов сүзләренчә, ике завод та Украина контролендә, әмма аларда эш туктатылган.
"Русия гаскәрләре Мариупольне хәрабәгә әйләндерә, тыныч хылыкны үтерә һәм заводларны бомбалый. Бернинди шартларда да бу заводлар Русия оккупациясе астында эшләмәячәк", – диде ул.
Ринат Әхмәтов үзе Донецкида туган. Әти-әнисе – Мордовиянең Сыркыды авылыннан.
Украинаның "Энергоатом" ширкәте Чернобыльдән Русия хәрбиләренең нурланыш белән китүен белдерде. Кичә, 31 мартта Пентагонга сылтама белән, AFP агентлыгы Русия хәрбиләре Чернобыль атом электр станциясеннән (ЧАЭС) чыгып китә башлады дип хәбәр иткән иде. Украинаның "Энергоатом" ширкәте җитәкчелеге әйтүенчә, Русия хәрбиләре Чернобыльнең радиациядән иң пычранган урыны булган Рыжий урманында фортификация корылмалары төзегән һәм шактый нурланыш дозалары алган. Русия саклану министрлыгында бу мәгълүматка фикер белдермәделәр. Монда тулырак.
Франция актеры Жерар Депардье Путинга мөнәсәбәтен үзгәрткән. Франциядә салымнарның югары булуына протест йөзеннән, Депардье 2013 елда Русия ватандашлыгы алган һәм Русия президенты Владимир Путинга соклануын белдергән иде. Актерга Русиядә төрле дәрәҗәле исемнәр, фатирлар да бүләк иттеләр.
Хәзер исә Депардье Путинның Украинага каршы сугышын кискен хөкем итеп чыкты. DW язуынча, Депардье Украинадагы сугыш Путинның “акылсыз һәм кабул ителмәслек эксцессы” дип белдергән.
Роскомнадзор Русиянең Сугышка каршы комитеты сайтын, шулай ук мөһаҗирләргә ярдәм проекты – "Ковчег"ның сәхифәсен томалаган. Бу Русия прокуратурасы таләбе белән эшләнгән. Бу хакта проектның Telegram-каналында хәбәр ителә.
Томалау турындагы карар 26 мартта чыккан. Прокуратураның чыганакны ни сәбәпле томалаттыруы билгеле түгел. Элегрәк Сугышка каршы комитет, Украина күгендә очышларны туктатуны сорап сорап, Көнбатыш илләренә мөрәҗәгать иткән иде.
Русиянең сугышка каршы комитетын мөһаҗирлектәге оппозицион һәм иҗтимагый эшлеклеләр оештырды. Монда тулырак.
Русиянең Украинага каршы сугышында Башкортстанның Иглин районы, Таутөмән авылыннан старшина Станислав Петрутик һәлак булган. Бу хакта район хакимияте башлыгы Гүзәл Насыйрова хәбәр итте, дип яза NewsBash.
Станислав Петрутик тумышы белән Хәйбулла районының Подольски авылыннан. 2000-2002 елларда гаскәрдә булган, 2013 елда Русия кораллы көчләре белән өч еллык килешү төзегән, соңрак аны ике мәртәбә озайткан. Аның өченче килешүе 2022 елның октябрендә тәмамланырга тиеш булган, ул Костромада хезмәт иткән. Петрутикның хатыны һәм ике кызы калган. Аны үлеменнән соң Батырлык ордены белән бүләкләгәннәр диелә. Монда тулырак.
Пензада мәктәп укучылары үзара сөйләшкән вакытта Украинадагы сугыш турында фикерен әйткән укытучы өстеннән әләкләп язган. Бу хакта "7×7" басмасы хәбәр итә.
Сигезенче класста укучы кызлар инглиз теле укытучысы белән сөйләшүне смартфонга яздырып алган, анда укытучы Русиянең гамәлләрен һәм Украина җирләрендә ни кылуын тасвирлаган. Нәтиҗәдә бу язма тәртип саклау оешмаларына барып эләккән.
Baza әлеге әңгәмәнең язмасын чыгарды. "Пензаинформ" мәгълүматына күрә, сөйләшү Олимпия резервы училищесы укытучысы Ирина Ген һәм сигезенче сыйныфта укучы ике кыз арасында булган, ул аларга Европадагы ярышка ни өчен бара алмаулары турында аңлаткан.
30 мартта Ирина Генга Русия Кораллы көчләре турында ялган мәгълүмат тарату маддәсе нигезендә җинаять эше ачылган. Украинага сугыш башланганнан соң Русия Җинаять кодексында барлыкка килгән яңа маддә биш миллион сумга кадәр штраф салуны һәм ун елга кадәр иректән мәхрүм итүне күздә тота.
Җинаять эше ачылган укытучыга 55 яшь, ул мәктәптә егерме елдан артык эшли диелә.
Медведев: Көнбатышны азык-төлек белән тәэмин итмәячәкбез, "кичке ашны дошманга бирмибез"
Русиянең элеккеге президенты, хәзерге Иминлек шурасы башлыгы урынбасары Дмитрий Медведев, Русия "дус булмаган илләрне", ягъни Украинага һөҗүм итүе аркасында Русиягә каршы чикләүләр керткән дәүләтләрне (барлыгы 50-ләп ил) азык-төлек һәм авыл хуҗалыгы культурасы белән тәэмин итүдән тулысынча туктаячак, дип белдерде.
Медведев Telegram-да язганча, азык-төлек ул – Русиянең "тыныч коралы", чөнки күп илләрнең азык-төлек иминлеге Русиянең тәэмин итүенә бәйле.
Медведев сүзләренчә, Русиянең эчке ихтыяҗларын тулысынча канәгатьләндерү өчен продуктлары җитешле. Шул ук вакытта ул "бәяләрне контрольдә тоту" турында да язган. Аның сүзләренчә, Русия азык-төлек һәм авыл хуҗалыгы культураларын "дусларына" гына бирәчәк.
"Безнең белән дус булмаучыларны азык-төлегебез һәм авыл хуҗалыгы продукциябез белән тәэмин итмәячәкбез. Һәм алардан берни сатып алмаячакбыз", дип яза Медведев.
Аның искәртүенчә, 2014 елдан Көнбатыш илләреннән азык-төлек кертүгә чикләүләр гамәлдә, әмма алар киңәергә дә мөмкин. "Кичке ашыбызны дошманга бирмибез", дип язган Медведев күпсанлы эмодзилар куеп. Сугыш башланганнан бирле Русия азык-төлек кибетләрендә бәяләр бик нык күтәрелде, шикәр юкка чыкты.
62 яшьлек пенсионер Рәисә Мөслимова Киев өлкәсендә яши. Заманында Үзбәкстаннан – Кырымга, ә Русия Кырымны басып алгач, Киевка күчкән. Бүген ул янә чемодан өстендә утыра.
"АКШтагы кызым үзе янына чакыра да бит, улымны калдырып китәсем килми, ә ир кешеләрне сугыш сәбәпле Украинадан чыгармыйлар. Бер көнлек тормыш белән яшибез", ди ул.
Сугыш башлаганнан соң аның Русиядәге туганнары белән дә аралары суынган.
"Русия Украинага басып кергәч, Путин сәясәтен хуплаган Чиләбе, Башкортстандагы туганнарыма да боларны сөйләп, аңлатып карыйм, әмма һич мәгънә юк, алар зомби кебек" ди ул.
Рәисә ханым белән әңгәмәне монда укый аласыз.