Татарстанда Украинага каршы сугышта һәлак булганнарның гаиләләренә ике миллион сум түләячәкләр. Бу хактагы фәрманны республика президенты Рөстәм Миңнеханов имзалаган.
Фәрманга ярашлы, Украинага каршы сугышта һәлак булганнарның гаиләләре республикадан өстәмә матди ярдәм алачак. Бу хакта Татарстан президенты сүзчесе Лилия Галимова хәбәр итте, дип яза "Казанский репортёр". Монда тулырак.
Maxar ширкәте Киев янында урнашкан Буча шәһәрендәге күмәк каберлекнең иярченнән төшерелгән фотосын чыгарды. Каберлек 13 мартка кадәр казылган. Ирпен шәһәренең беренче медик-санитар ярдәме үзәге мөдире Андрей Левковский сүзләренчә, ул датага анда 67 кеше җирләнгән булган. Ул Украина медикларының әлеге кабергә күп санлы корбаннарны китереп җирләве төшерелгән видеоны 12 мартта интернетка чыгарган иде. 1 апрельдә Буча шәһәре мэры Анатолий Федорук бу күмәк каберлектә 280 кешенең җирләнүен белдерде.
Украинадагы хәлләр турындагы хисабында БМО Кеше хокуклары югары комиссары идарәсе, сугыш башыннан бирле илдә кимендә 1417 сивил кеше, шул исәптән 121 бала үлүе рәсми расланды дип хәбәр итте. Яраланучыларның саны тагын да күбрәк. Украина баш прокуратурасы мәгълүматына күрә, 160тан артык бала һәлак булган.
БМО хисабында әйтелгәнчә, иң күп үлемгә китергән сәбәпләр — зур мәйданга зарар китерүче шартлаткычлар, шул исәптән авыр артиллерия һәм дәррәү ату реактив системнары куллану, шулай ук ракет һәм һава һөҗүмнәре.
Русия гаскәрләре чигенгәннән соң мәетләре табылган сивил кешеләр саны да исәпкә алынганмы — хисаптан аңлашылмый. Киев янындагы Буча шәһәре урамнарында дистәләрчә мәет ятуы хәбәр ителгән иде.
Украинаның үтерелгәннәрне эзләү һәм җирләү белән шөгыльләнүче коткару хезмәте вәкилләре сүзләренчә, 330лап мәет табылган. Украина баш прокуроры Ирина Венедиктова әйтүенчә, Бучада гына түгел, Киев өлкәсенең күпчелек азат ителгән районнарында үтерелгән тыныч халык вәкилләренең 410 мәете табылган.
1 апрель Русиядә хәрби хезмәткә язгы чакыру башланды. Быел ул сугыш барган чорга туры килде. Балалары армиядә хезмәт иткән йә анда барырга җыенган ата-аналар бүген ут йотып яши.
— Бик борчылабыз! Чөнки беркемгә дә ышаныч калмады. Менә сугышта срочниклар юк, диделәр. Бар булып чыкты! Алга таба нәрсә — малайларны дәрестән алып, кулларына автомат тоттырып үлемгә җибәрә башларлармы, дип уфтана Миләүшә ханым. Аның улына 21 яшь, көллиятне тәмамлаган программист, хәзер армиягә зәерләнә.
- Срочникларны сугышка җибәрә алалармы?
- Сугышка барудан баш тарткан өчен нәрсә яный?
- Хәрби хезмәтне ничек кичектереп була?
- Армиягә барырга теләмәүчеләр өчен нинди альтернатив юллар бар?
"Агора" хокук яклау төркеме хәрби хезмәткә чакырылучылар өчен кайнар элемтә ачты. Армия яше җиткән егетләр һәм аларның ата-аналары иң еш биргән сораулардан белешмә әзерләдек.
Әлеге белешмәне һәм башка әниләр белән әңгәмәне монда укый аласыз.
Башкортстан хакимияте кәбестә бәясенең кинәт артуын узган елгы корылык һәм рубльнең арзанаюы белән аңлатты.
Башкортстан премьер-министры Андрей Назаров үзенең Telegram-каналында республикада яшәүчеләрнең комментарларын җаваплап, кәбестә бәясе "чынлап та югары" һәм бу," беренче чиратта узган елгы корылык белән бәйле, корылык безнең аграрийларның уңыш күләменә йогынты ясады һәм безнең продукт тизрәк бетте", дип язды.
Шулай ук Назаров "продуктны башка илләрдән сатып алганда" рубльнең арзанаюы да бәягә йогынты ясавын искәртте, чөнки хәзер киштәләрдә "күбрәк якын чит илдән кертелгән кәбестәләр".
24 февральдә Русия Украинага каршы сугыш башлагач рубль бәясе башка илләр валюталарына карата бәясен бик нык төште. Монда тулырак.
Зеленский "Грэмми" тантанасында катнашучыларны Украинаны якларга чакырды
"Грэмми" музыкаль бүләген тапшыру тантанасында катнашучыларга видеомөрәҗәгатендә Украина президенты Владимир Зеленский аларны һәм тамашачыларны Русия белән сугышта "теләсә нинди ысул белән" Украинаны якларга чакырды.
"Музыкага иң контраст әйбер нәрсә ул?", дип сорый тамашачылардан Зеленский, һәм үзе үк җавап бирә: "Җимерелгән шәһәрләр тынлыгы һәм үтерелгән кешеләрнең дәшмәве". "Теләсә нинди ысул белән безне яклагыз, эндәшми тормагыз, шул вакытта безнең шәһәрләргә тынычлык килер", ди Украина президенты.
Тулырак монда
Украина президенты Владимир Зеленский бүген Киев янындагы Буча шәһәрендә булды. Бу шәһәр урыс гаскәреннән азат ителгәннән соң аның урамнарында дистәләрчә мәет табылган иде. Зеленский Русияне Украинада хәрби җинаятьләр һәм геноцид кылуда гаепләде. Шул ук вакытта ул, Русия белән сөйләшүләр алып бару кирәклеген әйтте. "Без дипломатик һәм хәрби тырышлыкларны дәвам итәчәкбез" диде ул.
Reuters агентлыгы һәм башка медиалар төшергән фотолардан күренгәнчә, Киев янында урнашкан, 35 меңләп кеше яшәгән Буча шәһәре урамнарында Русия оккупациясеннән соң дистәләрчә мәет ятып калган. Бу фотосурәтләрне бүген бар дөнья тикшерде. Без аларны бер галереяга тупладык.
Русия оккупациясеннән соң Буча урамнарында мәетләр таралып ята (фотодәлилләр)