Татарстанның Питрәч авылыннан 42 яшьлек Динар Хәметов Украинадагы сугышта һәлак булган. Аны кичә җирләгәннәр. Хәметовның өч баласы һәм хатыны калган.
Матбугат чаралары язуынча, Динар Хәметов өч тапкыр алтышар ай Сүриядә кайнар нокталарда булган.
Азатлык Украинадагы сугышта үлүче Татарстан һәм Башкортстан егетләренең исемнәрен туплап бара.
Британия премьер-министры Борис Джонсон Укаринага яңа ярдәм турында белдерде:
- 120 броньле машина.
- Корабларга атылучы яңа ракет корылмалары.
- Танкларга каршы торучы һәм зенит коралы.
- Халыкара валюта фонды аша $500 млн өстәмә кредит гарантияләре.
Бөтен бу ярдәм күләме 100 млн фунт стерлинг дип бәяләнә.
Башкортстаннан тагын ике егет Украинадагы сугышта һәлак булган.
Хәкимҗан Караголов - Бөрҗән районы Кургашлы авылыннан. 1997 елның 10 сентябрендә туган. Хатыны һәм өч баласы калган. Үлеме турында Бөрҗән районы башлыгы Газиз Манапов хәбәр итте. 8 апрельдә җирләнгән.
Игорь Насыйбуллин — Яңавыл районы Иске Вәрәш авылыннан. Әтисе - запастагы майор, бертуганы Александр да хәрби. Игорь Кемерово радиоэлектроника кадет корпусын, Казан югары танк училищесын тәмамлаган. Белгород өлкәсендә танк полкында хезмәт иткән.
Азатлык туплаган һәлак булучылар исемлегендә Башкортстаннан 40 фамилия бар.
Ихтимал Русия агрессиясен кисәтү өчен НАТО үз чикләрендә хәрби көчләрне даими тоту мәсьәләсен караячак.
Бу хакта Төньяк Атлантика берлеге Баш секретаре Йенс Столтенберге The Telegraph-ка әңгәмәсендә белдергән. Көчләрне урнаштыру мәсьәләсе июньгә Мадридта планлаштырган НАТО очрашуында кабул ителәчәк.
Украина сугыш вакытында үтерелгән Русия хәрбиләре күмелгән туганнар каберлеге табылуы турында белдерә.
Украина кораллы көчләренең Стратегик коммуникацияләр идарәсе хәбәренчә, каберлек Харьковтан 8 км урнашкан Ольховка авылында табылган. Идәрә фотолар да күрсәтә (аларны карау авыр булырга мөмкин - ред.)
Сугыш шартларында әлеге мәгълүматны раслау яки кире кагу мөмкин түгел.
Сильвио Берлускони: "Путиннан күңелем кайтты"
Италиянең элекке премьер-министры Сильвио Берлускони үзенең "Италия, алга" фиркасе тарафдарлары алдыннан чыгыш ясап, Русия президенты Владимир Путиннан аның Украинага басып керүе өчен "күңелем кайтты" дип белдерде.
"Украина кебек нейтраль илгә моңарчы күрелмәгән агрессия бу. Ул үз азатлыгы өчен зур намус белән көрәшә. Украинага каршы агрессия Русияне Кытай кулларына китерде. Кызганыч, бөтен дөнья алдында бик җитди җаваплылык алган Владимир Путиннан күңелем кайтты һәм мин бик борчулы", дип китерә Берлускони сүзләрен фирка матбугат хезмәте.
Элегрәк Берлускони Путинны үзенең дусты дип атап килде, алар бер-берсенең резиденцияләренә килә иде. Путин аны 2021 елда теленнан туган көне белән котлаганнан соң Берлускони Путинның "заманның халыкара сәяси аренасында соңгы күренекле лидеры" дип атаган иде.
Мәскәүдә Кызыл мәйданда хакимиятләр тарафыннан ябылган "Мемориал" хокук яклау үзәге башлыгы Олег Орлов тоткарланган. Ул мәйданга пикетка чыккан булган. Кулына "Безнең хакыйкатьне белергә теләмәү һәм дәшмәү җинаятьләр кылуда катнашучы итүчә" дип язылган плакат тотып торган.
Татар милли хәрәкәте активисты, "Азат Идел Урал" хәрәкәтенең Польшадагы вәкиле бу ялларда Польшада Украинага теләктәшлек белдереп митингка чыккан.
Кулына ул Татарстан байрагы тоткан иде.
Нәфис Кашапов чыгыш та ясаган. "Путин бандитлары - ФСБ, ГРУ - халыкара трибуналга эләгәчәк. Бу фашист режимы үзләренекен дә үтерә, украиннарны үтерә. Алар тыныч халыкны үтерә. Без, татарлар, сезнең белән. Украиннар бүген Русия өчен дә, Русия азатлыгы өчен дә зыян күрә. Украина җиңүеннән соң Русия ирекле булачак", дигән ул.
