шәкли фәһем

Bush CIA başlığı urınına xärbi generalnı täqdim itte

Düşämbedä Amerikan prezidentı George Bush Hawa köçläre generalı Michael Hayden''nı Küzläw idaräse başlığı urınına täqdim itte. İdaräneñ elekke citäkçese Porter Goss 2 yıl eşlägännän soñ comğa könne wazifasınnan kitkän ide. Şuşı sivil wazifağa xärbi keşene quyu niäte Washingtonda qarşılıqlı reaksiägä säbäp buldı. Kongresstağı demokratlar da respublikannar da bu uñaydan borçılu belderä.

Bush häm Merkel İran, Hämäs turında belderülär yasadılar

Quşma Ştatlar prezidentı George Bush häm Germaniä kanslerı Angela Merkel, Tährannıñ atom qoralına iä buluına yul quyılmasqa tieş, digän urtaq belderü yasadılar. Atnakiç könne Amerikanıñ Yäxüd komitetında çığış yasap alar şulay uq, Hämäs İzrail däwläteneñ yäşäw xoquqın tanımasa, Hämäs citäklägän Fälestin idaräse belän eş itmiäçägen belderdelär.

Amnesty International Rusiäne rasizmğa qarşı köräşergä öndi

Atankiç könne xoquq yaqlawçı abruylı Amnesty International oyışması Rusiä xökümäten ildäge millätara näfrätkä nigezlängän höcümnär dulqının tuqtatu öçen xälitkeç çaralar kürergä çaqırdı. Oyışmanıñ bügen iğlan itelgän xisabında äytelgänçä, Rusiäneñ rasizmğa qarşı tieşle däräcädä köräşmäwe anıñ xalıqara abruyına zur zıyan kiterä.

İran turındağı qarar ölgese äzer, İminlek Şurası anı tikşerä başlıy

Çärşämbedä İrannıñ atom programması turındağı qarar ölgese BMOnıñ İminlek Şurasına tapşırıldı. Könbatış illär äzerlägän dokumentta İranğa çikläwlär kertü älegä qaralmağan. Şuşı dokument nigezendä xäzer Şura İran turında urtaq qarar äzerläw eşenä kereşä. Bu eş atnalarğa suzılırğa mömkin.

Gazprom Rusiä mediasın yotuın däwam itä

Rusiäneñ ilküläm televidenie kanalları inde küptän Kreml kontrolendä, küpmeder däräcädä ireklege bulğan mäglümät çarası dip gäzitlär sanala ide. Xäzer alar da, bulğan ireklegen yuğaltırğa mömkin. Qayber xäbärlärgä kürä, däwlät qaramağındağı Gazprom şirkäte Rusiäneñ kimendä ike ere gäziten satıp alırğa cıyına.

Bäxetne aqça belän sanap bulamı?

"Bäxetne satıp alıp bulmıy" digän härkemgä mäglüm äytemgä qaramastan, bäxet töşençäsen öyränüçe ğalimnär kesädäge aqça küläme belän bäxet arasında turı bäyläneş bar dip sanıy. Härxäldä, Könbatışta şulay, di alar. Ä menä başqa urınnarda, şulq uq Rusiädä, keşelärne närsä bäxetle itä?

Qırğızstanda xakimiätkä protest belderü çarasında meñlägän keşe qatnaştı

NATO tışqı eşlär ministrları Sofiada. Kön tärtibendä: İran, Äfğanstan, kiñäyü

Comğa könne Bolğarstan başqalası Sofiada NATO tışqı eşlär ministrlarınıñ ike könlek oçraşuı tämamlandı. Oçraşuda Äfğanstandağı xärbilär sanın arttıru, İran krizisı, NATOnı kiñäytü kebek mäsälälär tikşerelde. Qayber xäbärlärgä qarağanda, Washington Ukrainanıñ Alyansqa quşıluın tizäytü yağında.

Aliev: Äzerbaycan İran krizisında Washingtonğa yärdäm itä almıy

Äzerbaycan prezidentı İlham Aliev bu atnada Washingtonda amerikan räsmiläre, şul isäptän, comğa könne prezident Bush belän oçraşa. Xoquq yaqlawçı oyışmalar, Äzerbaycanda demokratik üzgäreşlärneñ bik sülpän baruın iskä alıp, Bushnı Alievkä basım yasarğa çaqırdı. Ämmä söyläşülärdä töp iğtibar Äzerbaycannıñ energiä baylıqlarına häm Alievneñ İran tiräsendäge bäxästä nindi rol uynıy aluına bireler dip kötelä.

Tomskida Rusiä-Germaniä sammitı başlandı, kön tärtibendä gaz, İran...

Çärşämbe-atnakiç könnärendä Seberdäge Tomski şähärendä Rusiä prezidentı Vladimir Putin belän Germaniä kanslerı Angela Merkel oçraşuları ütäçäk. Merkel kansler bulıp saylanğannan birle bu alarnıñ ikençe sammitı. 2 könlek söylşülärdä gaz eksportınnan alıp İrannıñ atom programmasına qädär küp sanlı mäsälälär tikşereler dip kötelä.

3 könnän İminlek Şurası İran mäsäläsen tikşeräçäk. Tähran çigenergä cıyınmıy

Comğa könne Berläşkän Millätlär İminlek Şurası İrannıñ atom programması mäsäläsen tikşerergä cıyına. Utırışqa berniçä kön qala İran prezidentı Mäxmüt Äxmädinecad, İranğa çikläwlär kertelsä, Xalıqara atom energiä idaräsennän çığu belän kisätte. Quşma Ştatlar däwlät sekretare Condoleezza Rice monı Tährannıñ tağı da tiränräk izalatsiägä bata baruwı dip atadı.

Rusiä räsmiläre millatara näfrätkä qarşı ixlastan köräşäme?

Xäbärlärdän işetüegezçä, Rusiädä çit il keşelärenä höcümnär tuqtalmıy. Rusiä räsmiläre, nixayät, bu höcümnärneñ millätara näfrätkä nigezlängänen tanıp, moña qarşı köräşü niäten belderä başladı. Ämmä bu kampaniägä säyäsi tösmer birelüe anıñ çın maqsatlarına qarata şik tudıra.

Rusiädä çegännär ezärleklänä, monıñ öçen xökümät häm media cawaplı, di xoquq yaqlawçılar

Uzğan atnada Volgograd ölkäsendä ike çegän qıynalıp üterelgännän soñ, xoquq yaqlaw oyışmaları, Rusiä räsmilärenä häm mäglümät çaralarına möräcäğät itep, çegännärneñ il buylap ezärleklänüen tuqtatırğa çaqırdı.

Peterburda Afrika studentı üterelde. Rusiädä taqırbaşlar baş kütärä

Rusiädä näfrätkä nigezlängän cinäyätlär sanı arta. Comğa irtäsendä Peterburda tağın ber çit il studentı üterelgän, bu yulı Senegal yegete. Töñge klubtan qaytıp barğanda ber törkem Afrika studentlarına ut açqannar. Höcüm urınında Nazi tamğası töşerelgän qoral tabılğan. Xoquq yaqlawçı Sova oyışması mäglümätenä kürä şuşı yılda ğına Rusiädä näfrätkä nigezlängän 40tan artıq höcüm yasalğan, 6 keşe üterelgän, 80gä yaqını cäräxätlängän.

7 April – Sälämätlek köne uñayınnan Paqstan tabibı Fazal Äxtär xätiräläre

7 April comğa könne dönyada Sälämätlek köne bilgelänä. Berläşkän Millätlär Oyışması bıyıl anı tabiplarğa bağışlıy. Här könnären başqalarnıñ ğömeren saqlawğa, yärdäm itügä bağışlağan bu fidäqär keşelär yış qına xezmätlären bik awır şartarda kürsätergä mäcbür. Sälämätlek köne uñayınnan xäzer sezgä Paqstan tabibı Fazal Äxtär xätirälären täqdim itäbez. Uzğan yılnıñ üktäberendä bulğan cir teträwennän soñ ul qaza urınına barıp qorbannarğa berençe yärdäm kürsätkän.

İtaliädä saylawlar yaqınlaşa, Berlusconi xakimiättä qalu öçen köräşä

İtalia premier-ministrı Silvio Berlusconi Yewropada iñ qarşılıqlı citäkçelärneñ berse. Eşquar, millarder, AC Milan futbol klubın häm ildäge mäglümät çaralarınıñ zur öleşen kontrol itä. Şuña da qaramastan, 5 könnän ütäçäk saylawlarda anı awır köräş kötä. Soñğı fiker beleşügä qarağanda, anıñ köndäşe Yewropa komissiäseneñ elekke prezidentı Romano Prodi 3-5 protsentqa alda bara.

Ğiraq: Rice häm Straw Bağdadqa kilep, Ğiraq xökümäten tözü eşen aşıqtıra

Ğiraqta 15 Dikäber parlament saylawlarınnan soñ 3 ay yarım waqıt ütte, yaña xökümät äle dä tözelmägän. Bu eş premier-ministr İbrahim Äl-Cağfariğa yöklängän ide. Ämmä körd häm sönni firqälär anı buldıqsızlıqta ğäyepli häm kitüen taläp itä. Şuşı wazğiät Washingotnda da, Londonda da borçılu uyattı. Ğiraq xökümäten tözü eşen tizlätü maqsatı belän yäkşämbedä Bağdadqa kötelmägän säfär belän Quşma Ştatlar däwlät sekretare Condoleezza Rice belän Britania tışqı eşlär ministrı Jack Straw kilep töşte.

Rusiä Gruziä belän Moldovadan şäräp kertüne tıya

Rusiäneñ, Amerika belän genä tügel, ä qayçandır "tuğandaş respublikalar" bulğan Gruziä häm Molodova belän dä araları bozılğannan-bozıla bara. Uzğan atnada Rusiäneñ baş sanitar tabibı, Gruziä häm Moldova şäräpläre Rusiä taläplärenä turı kilmi, digän añlatma birep, alarnı ilgä kertüne tıydı. Bu qarar Gruziä belän Moldova iqtisadlarına zur orım bulıp tora. Qayber küzätçelär monı Mäskäwneñ säyäsi basımı dip sanıy.

Xalıqara Matbuğat İnstitutı xisabı: 2005 yılda 65 jurnalist üterelgän

Atnakiç könne Xalıqara Matbuğat İnstitutı Dönyada matbuğat ireklege torışı turında yıllıq xisabın bäyän itte. Älege xisapqa kürä, bar dönya buylap jurnalistlarnı ezärlekläw uzğan yılda da däwam itkän, dönyanıñ här töbägendä jurnalistlar xäbär citkerü öçen köräşergä mäcbür.

Äfğanstanda Taliban "yazğı höcüm" başladı

Soñğı könnärdä Äfğanstannıñ könyağında kierenkelek arta. Çärşämbegä qarşı töndä Taliban suğışçıları Helmand wilayätendä koalitsiä köçläreneñ nığıtmasına höcüm itkän. Ber amerikan, ber kanada xärbie, distälägän ğisyançını häläk bulğan. Taliban süzçese monı "yazğı höcüm" dip atadı.