Америка күзләве Русия президенты Владимир Путинның киңәшчеләре аннан Украинадагы сугышта Русия гаскәрләренең уңышлары чынлыкта нинди булуы турындагы дөреслекне яшерә дип саный. Бу хакта АКШ хакимияте вәкиленә сылтама белән Associated Press яза, ул аноним булып калу шарты белән аралашкан. Хакимият вәкиле сүзләренчә, аерым алганда, Путиннан сугышта мәҗбүри хәрби хезмәткә алынучылар ("срочниклар") катнашуы һәм аларның үлү очраклары турындагы мәгълүматны яшерәләр. Америка түрәсе әйтүенчә, Көнбатыш санкцияләренең Русия икътисадына зыяны масштабларын да Путиннан яшерергә тырышалар. Монда тулырак.
Украина президенты Владимир Зеленский Русия хәрбиләре Украинаның авыл хуҗалыгы потенциалын максатчан рәвештә юк итә һәм бу дөньяда азык-төлек кризисына китерә ала дип кисәтте. Зеленский моны Нидерланд парламенты депутатларына онлайн мөрәҗәгатендә белдерде.
“Русия гаскәрләре безнең авыл хуҗалыгы тармагын максатчан рәвештә җимерә. Алар басуларга миналар куя, авыл хуҗалыгы техникасын юк итә, безнең аграр потенциалны бетерү һәм, Украинада гына түгел, дөньяда азык-төлек кризисы булдыру өчен бөтенесен дә эшли”, диде президент.
Ул Украинаның Европада һәм дөньяда иң көчле авыл хуҗалыгы үзәкләренең берсе була алуын белдерде. Аның фикеренчә, хәзеге куркыныч чорны узып булачак, һәм Украина, халыкара партнерлар белән бергәләп, потенциалын тагын да арттырачак һәм чыннан да “глобаль авыл хуҗалыгы куәтенә” әвереләчәк.
Украинадагы сугышның чираттагы корбаны — Башкортстанның Учалы районы Озерный авылы егете Илнар Байегетов һәлак булган. Бу хакта аның мәктәп укытучысы Нәкыйп Аюпов хәбәр итте. Илнарга 24 яшь булган.
Социаль челтәрләрдә "наци атрибутикасын яки символикасын пропагандалауда" гаепләнеп, 15 тәүлек сак астында тотылганнан соң, 31 мартта Кырымдагы хокук яклаучы Абдурешит Джеппаров иреккә чыккан. Бу хакта Русия аннексияләгән Кырымда эшчәнлек алып баручы "Кырым теләктәшлеге" иҗтимагый берләшмәсе хәбәр итә.
"Мин 15 тәүлек утырдым. 15 тәүлек ни ул? Безнең күпчелек егетләр 10-15 ел утыра. Аллаһ бирер, аларның барысы да тизрәк иреккә чыгып, гаиләләренә кушылсын иде. Безнең халык арасында 100дән артык кеше тоткынлыкта утыра", дигән Джеппаров Кизләү (Евпатория) изоляторыннан чыккач. Монда тулырак.
Бер атна элек Бердянски портында украин ракетасы белән Русиянең "Саратов" десант корабы батырылган иде.
Бүген шул корабның иярченнән төшерелгән фотосурәтләре пәйда булды. Анда корабның бөтен палубасы диярлек су астында булуы күренә.
АКШ финанс министрлыгы Русиянең 21 оешмасына һәм 13 русиялегә каршы яңа санкцияләр кертте
Аерым алганда чикләүләр "Вектор" фәнни-тикшеренү институты, "Микрон", "Сертал", "Серия инжиниринг" һәм хәрби проектлар белән тыгыз бәйле башка ширкәтләргә кертелә.
"Русия берни белән акланмаган агрессиясе белән Украина суверенитетын бозып кына калмый, сивил халык һәм торак пунктларга һөҗүмен көчәйтте, – дип белдерде АКШ финанс министры Джэнет Йеллен. – Без Путинның хәрби машинасына каршы санкцияләрне төрле яктан юнәлтүне дәвам итәчәкбез, бу мәгънәсез сугыш тәмамланганчыга кадәр".
БМО Украинадагы хәрби җинаятьләрне тикшерү комиссиясе эше башлануы турында игълан итте
Бу комиссиягә Норвегия, Босния һәм Һерцеговина һәм Колумбия юристлары кергән.
Комиссия 2014 елдан башлап Донецки һәм Лугански өлкәләренең кайбер районнарында һәм 2022 елның 22 февраленнән башлап Украинаның башка районнарында кеше хокукларын һәм халыкара һуманитар хокукларны бозу очракларын тикшерәчәк.
Комиссиягә Украинада кеше хокукларын яки халыкара һуманитар хокукларны бозу буларак билгеләнә алган фактларны барлау йөкләнгән.
Комиссиягә шулай ук "Укураинада кеше хокукларын бозу өчен җаваплы физик һәм юридик затларны һәм алар белән бәйле җинаятьләрне" билгеләргә тәкъдим ителгән, - диелә БМОның рәсми сайтында.
Британия саклану министрлыгы: Киев читендә якын көннәрдә бәрелешләр башланырга мөмкин
Бу хакта Британия саклану министрлыгының күзләү мәгълүматына нигезләнеп әзерләнгән бүгенге [31 март] хисабында әйтелә.
Русиянең Киев һәм Чернигов юнәлешләреннән гаскәрнең бер өлешен алуы турындагы белдерүенә карамастан, Русия ягыннан атышлар дәвам итә. Русия армиясенең төп максаты булып торган Мариупольда да авыр бәрелешләр дәвам итә. Украина хәрбиләре шәһәрнең үзәге әлегә алар контролендә дип белдерә.