Микрочиплар һәм компьютер җиһазлары җитештерүче Intel ширкәте Русия һәм Беларус базарындагы эшчәнлеген тулысынча туктатуын игълан итте.
"Intel, бөтен дөнья җәмәгатьчелеге кебек, Русиянең Украинага каршы сугышын нәфрәт итә һәм тиз арада тынычлыкны торгызырга чакыра. Без бу сугыштан зыян күргән һәркемгә - аеруча Украина һәм күрше илләрдә яшәүчеләргә, ул җирләрдә гаиләләре, дуслары, якыннары булган һәркемгә яклау белдерәбез”, диелә ширкәт белдерүендә.
Федераль салым хезмәтенең (ФНС) үзәк идарәсе, банк аша уздырмый гына чит ил акчасын сату-алу белән бәйле хокук бозуларны ачыклау өчен, төбәкләрдәге оешмаларына эчке эшләр министрлыгы белән бергә хезмәттәшлек итүне оештырырга кушкан.
Бу хакта, ФНСның төбәкләрдәге идарәләренә җибәргән хаты белән таныш булган ике чыганагына сылтанып, РБК хәбәр итә.
Басма мәгълүматына күрә, салым хезмәте социаль челтәрләрдә, Telegram-каналларда һәм игъланнар бирү сервисларында кулдан кулга чит ил акчасы сатуларын искәртә.
"Хәзерге шартларда бу Русия акчасының һәм эчке валюта базарының тотрыклылыгына куркыныч тудыра", диелә ФСН хатыннан РБК китергән өземтәдә.
"Соңгы вакытта чит ил акчасын канунсыз сату-алу очраклары киң таралды, шул сәбәпле салым оешмаларына, эчке эшләр оешмаларының мөмкинлекләрен исәпкә алып, мондый хокук бозуларны ачыклауга аерым игътибар итәргә кушылды", дип аңлатканнар басмага Федераль салым хезмәтенең матбугат хезмәтендә.
Беларуста күп бала анасы Русия белән Украина арасындагы сугышка каршы протест йөзеннән Лукашенкага Ана орденын кире кайтарды
Җиде бала анасы Алена Яковишина Беларус президенты Александр Лукашенка хакимиятенә 2019 елда бүләк ителгән Ана орденын кайтарды. Аңлатмада, ул Лукашенкага дәүләт башлыгы буларак хөрмәтен һәм ышанычын югалтканын язды. Бу хакта Азатлык радиосының Беларус хезмәте хәбәр итә.
Русиянең куәт оешмасы вәкилләре, Русия аннексияләгән Кырымның Акшейх (Раздольное) бистәсендә, кырымтатар активисты Сервер Бариевның өендә тентү уздыра. Бу хакта 6 апрель иртәсендә "Кырым теләктәшлеге" хәбәр итте.
Урында яшәүчеләр сөйләвенчә, аның өе каршында ике ак микравтобус тора.
"Сервер Бариев теш технигы булып эшли һәм сивил активизм белән шөгыльләнә. Элегрәк, 2019 елның гыйнварында Кырымның Экстремизмга каршы көрәш үзәге аның һәм тагын ике кырымтатар активисты – Осман Османовның һәм Эрнест Эмирасановның өйләрендә тентү уздырган иде инде" диелә.
Активист вакыт-вакыт үзе артыннан күзәтеп торуларын сизүен әйтеп килгән.
Үзе әйтүенчә, Бариевне хәзергә кадәр күзәткәләп торганнар: "Машиналар гына алмашына. Башта маркаларын истә калдыра идем, номерларын теркәп куйдым, ә соңыннан алар шулкадәр күбәйде һәм алмашып тора башлады ки, болай эшләүдән туктадым", диелә хәбәрдә.
Украинаның Тышкы эшләр министрлыгы мәҗбүриләп Русиягә депортацияләнгән украиннарны якын илләрдәге Украина илчелекләре белән элемтәгә керергә чакырды. Министрлык илчелекләрнең адресларын үзенең телеграм каналында урнаштырды.
Казанга да 2нче һәм 3нче апрельдә Украинадан барлыгы меңгә якын кеше килде. Украина ягы Мариуполь кешеләрен Казанга Русия мәҗбүриләп китерде дип белдерде.
Русиядә томаланган "Медиазона", Republic, "Тайга.Инфо" һәм Чиләбенең "Лентачел" басмасы Мәскәүнең Тверь районы мәхкәмәсенә үзләрен томалаулары турындагы карарларны канунсыз дип табуны таләп итеп дәгъва тапшырган. Бу хакта "Сетевые свободы" проекты хәбәр итә.
24 февральдә Русия Украинага каршы сугыш башлаганнан соң, Роскомнадзор мәгълүмат чараларыннан бу вакыйгаларны яктыртканда бары тик Русиянең рәсми чыганакларыннан алынган мәгълүмат-белешмәләрне генә куллануларын таләп итте.
Шуннан соң Баш прокуратура хәрби хәрәкәтләрне, янәсе Русия гаскәре турында "ялган белешмәләр урнаштырып"яктырткан сайтларны томалауны таләп итә башлады.
"Редакция бу гамәлләрне канунсыз дип саный һәм мәхкәмәгә мөрәҗәгать итте. Томалауны кичекмәстән гамәлдән чыгаруларыннан тыш, "Тайга.инфо" шулай ук мәхкәмәне Баш прокуратураның 24 февральдә һәм 9 марттагы таләпләрен, [томалау турындагы карарны Роскомнадзор аларга нигезләнеп кабул иткән] канунсыз дип тануны сорый", диелә "Тайга.инфо белдерүендә.
"Тайга.Инфо" дәгъвасы нигезендә мәхкәмә утырышы 21 апрельдә узачак.
"Сетевые свободы" шушындый ук дәгъваларны "ВКонтакте" томалаган Ateo паблигы, DOXA студентлар журналы һәм башка мәгълүмат чаралары да әзерләвен хәбәр итә.
Русия башлаган Украинадагы сугышта Башкортстаннан тагын бер егет һәлак булган. 22 яшьлек Винер Сәйфуллин контракт нигезендә хезмәт иткән. Бу хакта Кыйгы районы хакимиятенең Вконтакте битендә язылган.
Сәйфуллин 1999 елны Югары Кыгыйда туган. 2018 елда армиягә алынган һәм 2019 елда Оренбур өлкәсе Тоцкое – 4 бистәсе хәрби бүлегендә контракт нигезендә хезмәт итә башлаган.
Азатлык Украинадагы сугышта һәлак булган Татарстан һәм Башкортстан егетләрен бер исемлеккә туплап бара.
Татарстан театрлары, мәдәни оешмаларга Русиянең Украинага каршы башлаган сугышына теләктәшлек белдерү күрсәтмәсе төшерелгән, күрәсең. Театрлар, музейлар Z хәрефен урнаштыруны дәвам итә. Кемдер аны зур итеп ясап элеп куя, кемдер башка ысуллар таба.